فى سن العشرين .. ارجوك اكبر واعقل

بعد تخطى سن العشرين  عليك ان تدرك ان

الحياة بدأت بالفعل ....

يعنى خلاص مبقاش فى حاجة اسمها   لما  اكبر !

مفيش حاجة اسمها  هعمل كذا  فى المستقبل  لاءاا  انت دلوقت فى المستقبل  ولازم  تركز معايا فى النصائح دى عشان انت 

خلاص بقيت كبير  ناضج  يعنى . مش قصدى عجزت  تمام   

  

" لو قررت تحب ،يبقا  لازم تستحمل  " كسرة القلب#

خلى بالك  وركز  معايا  مش معنى ان انت حبيت حد  والحد دة رفض حبك  او محسهوش اوعى  تضايق او تلوم علية  اوعى  (خلى بالك من دى جداا ) اوعى  تانى ارجوك  اوعى  تفقد الثقة فى نفسك  ارجوك اوعى يجيلك  احساس  بالنقص  او انك متستاهلش انك تتحب او ان فيك حاجة غلط   فى  شكلك مثلا  لبسك  صوتك كلامك  شخصيتك  لاءاا خالص صدقنى  هو الموضوع  بس  وكل الحكاية ( دقة قلب ) 

قلبة او قلبها مدقش ليك  عادى جدا  ودة ملوش اى علاقة بشخصك او شكلك تمام  اتفقنا ؟؟!  عشان بس الاحاسيس  الوحشة اللى بتجيلك  فاية  اكبر واعقل  كدة  تمام ..

حاجة تانى.... كمان فى الحب   لو حبيت حد وخذلك   او ضحك عليك  او فضل حد عليك او مكنش قد كلمتة او اى ان كان  الموقف   ارجوك  اكبر كدة  بتفكيرك  وفكر بعقل كبير  وافهم  ان دة عادى  وبيحصل وهيحصل  وان دة مش اخر الكون   لاءاا  خالص    لسة فى حاجات حلوة كتيرة جاية  متعاشتش  ولسة فى ناس احلى مقابلتهاش  وخلى بالك   .. اللى حصل معاك دة  محصلش  عشان انت  عبيط او  غلبان  او  ملكش فى الحب لاءا   اللى حصل دة عشان الطرف التانى هو اللى  قليل اصل  وميعرفش اصلا يعنى اية حب   ارجوك  ارجوك  اوعى تفقد الثقة فنفسك  انت  شخص نقى وابيض من جوة   وهتلاقى اللى شبهك واللى يستاهلك  ودى كانت تجربة وهتعدى منها  وترجع اقوى وانضج واكبر من الاول ...

     

المذاكرة لا تنتهى باخر  امتحان  خلى بالك  عشان تكون حد مميز  لازم تفهم وتركز انت بتذاكر اية ولية  مش تعمل زى اللى #

 بيحفظ معلومات  يدوب يكتبهم فى ورقة الامتحان ويطلع  تسألة بعد  الامتحان ولا يعرف اى حاجة عن اى حاجة  

طور  نفسك  هقولها  تانى  طووووور   نفسك  تمام  متزنقش نفسك فى ماتريال الكلية  وبس   لاء  اشتغل على نفسك  جامد#

  نزل برامج ديزاين  واوفيس واتدرب عليها   خدلك كورس  انجلش  اونلاين  من للى من غير فلوس دة الفرى  عشان  متقولش 

 هصرف على الكلية ولا الكورسات الخارجية  صدقنى  بيبقا  حلو جدا ومفيد  المهم  تاخد الموضوع على محمل الجد  ومتهملش  ..  اتعلم اى  حاجة ترجمة كتابة مقالات    برمجة واشتغل فرى لانسر  على النت واقبض بالدولارر   ايوة  صدقنى الكلام دة موجود بس عاوز عزيمة واصرار  ..

علاقاتك  الاجتماعية  ..ارجوك  اتعرف على اى حد تقابلة فى الكلية  دفعات كبيرة  دفعات صغيرة  خرجين   او ادخل# 

 اتحاد   الطلبة   ساعد  غيرك  اتطوع   اشرح لحد  حاجة مش فاهمها   بلاش تكتئب وتنعزل  على نفسك  وتمشي مع واحد او اتنين وتقول دول  اصحاب عمرى  وخلاص   لاء ارجوك  متعملش  كدة  ارجووك  عشان يوم لما  ميبقوش نازلين   وفى كورس  مهم او سكشن مهم  صدقنى ممكن توصل لحتة  انك ملكش نفس تنزل عشان هما مش نازلين  وقيس على دة كذا  حاجة    القسسم  مثلا   انا اعرف ناس  مرضيتش تدخل  القسم  اللى بتحبة عشان بس اصحابهم مدخلهوش   وعشان مش عاوزة  تبقا  وحدها   متخيل !!متخيل ان فى حد ممكن  يعمل حاجة مش بيحبها او يقعد فى مكان مش طايقة   عشان بس ميبقاش  وحدو  ؟ ! وعشان  اصحابة بس موجودين ! تخيلت  ؟؟  طاب تخيل ان الشخص دة فشل   متخيل احساسة بالندم   اللى هو  انا يا ربى  من الاول  مش حابب كنت القسم دة  بس دخلتو عشان مبقاش وحدى  عشان ابقا معاهم  احساس  صعب  صح ؟؟   عشان  كدة بقولكك   عود نفسك تتعرف على اى حد   مش لازم تكونو اصدقاء  لاء  تعارف زمالة   ... عشان كدة كمان  اتعلم   متربطش  حياتك  باشخاااااص   ارجوك  هقولها تانى    اتعلم  متربطش حياااتك  باشخاص    اربطها   باهداف    .. عمرك ما هتقع ولا الف  صدمة  ولا الف فشل هيقدر عليك لو عملت كدة  مش هيهمك حد  مش هيهمك  فلان وصل لفين وانت فين    .. علان بيعمل اة وانت اة  ..  مش هيهمك ومش هتفكر لما تبقا نازل  كورس   : سكشن ,ندوة ,شغل  جديد   مش هتفضل  تفكر وتقول   ياترى  هلاقى حد اعرفة  ياترى فلان رايح  طاب  هبقا وحدى ؟؟؟   كل دة مش هتفكر  فية ولا هيشغلك ولا  هيجى على بالك حتى..

العشم .. اسوء حاجة فى الوجود   فى الكون  كلة  ارجوك   اكبر  واعقل كدة وبطل تتعشم فى حد   ينفع ؟  مهما كان قريب ليك# 

 مهما كانت علاقتكم قوية   مهما  كنت معتبرة  اخ   او معتبراها اختك     ارجوكم  كفاية  عشان  العشم بيذل  عارف يعنى  اية بيذل   يعنى بيخليك قد السمسة   فى نظر نفسك   .. يعنى  ممكن تعاتب  حد قريب اوى منك   بعشم  وتبص تلقاة    مش هامة العتاب  ولا كانك   قولت حاجة وبيكرر نفس اللى بيضايقك  من غير ما يراعى شعورك ولا نفسيتك  

       يعنى ممكن  يحصلك موقف وحش لقدر اللة  وتكون حاطط فبالك  .. 

   يعنى ان فلان   دة هيكون اول واحد  جنبك وف ضهرك  تبص فجأة متلقهوش   وتلاقى ناس غريبة  وهو مش موجود  ساعة الجد  اختفى  معملش  اللى كنت متوقع ان يعملة   خذذذذذلك .. متصرفش  زى ما كنت هتتصرف انت  لو كنت مكانة وهو مكانك  ..مش عاوزة اقولك  احساسك  ساعتها  بيكون ازاى  .. مهما حاولت اوصف   مش هتتخيل الاا  لو اتحطيت فى نفس الموقف  عشان  كدة بقولك  اكبر واعقل  وبطل تتعشم  كتيرر  انت  بقيت ناضج ولازم تدرك  ان مبقاش ينفع تتعشم فى حد .. 

((دمتم  كبار  وعاقلين ))

 "نفسك  ليها حق عليك  "

اكبر واعقل  عشان تبقا ناضج